ذبلت ايامي وبعد ما بيه ليل

ذبلت ايامي وبعد ما بيه ليل
خلك ماكو بجفني يتلكه السهر
مر علي بمرورتك وانكتني حيل
اطيح من راسي محطات وسفر
حوبتك بيه ولبست الصحره ثوب
وماكو غيرك ينزل بروحي وفر
روح يبسني العطش سواني كاع
واني جنت اتبده بخيالك نهر
وين وجهك ورث بصدري هواك
وكمت بلدخان ادورلك اثر
ترس روحي الضباب وبينت وياك
كلي بروحك امشي وجرحي ما شفته
انه بلنسمه اعثر وانت قيس الحال
مو جدمي وراك خيالي ما شلته
واجي بواهس عذر وحروفي مني اطيح
واتبده على وجهك مستحه وسكته
وانخل غير وجهك واليطيح تراب
وانكتهم واهزهم بس تضل انت
رمح فركاك اجناني مسابك ويه الريح
ماقصرت تسلم بلنفس جبته
بس المحترك يفهم حجي الدخان
يعرف حرورته ويفهم سبب علته
مثل عاشك بغربه ومره وكت غروب
يفرفح من يمر طاري الهوه يموته
انه بخصر السنابل جم حلم ضميت
وطعم شبكت المنجل من رحت ضكته
الندى عمره مسافه ومن يطيح يموت
وانه بعمر النده وفجرك وصل وكته
اذا فوك الورد لو فوك صخره يطيح
ما تفرق بعد لو عمري طيحته
انه مبلل عشك يليبست ملكاك
رحت وخيال وجهك عيني حاضنته
واضفر بلخلك بلكت كصيبه يصير
وضوه جفوفك بصدرك الكاعه ضافرته
واغص بليل واكصر والمسافه اطول
واجي وتعثر عيوني بكل اثر عفته
واجي مغيم سهر يمك وانكط ليل
وطرت مو بلسمه لا بلحجي الكلته
وعكس خط الضوه روحك بروحه اطير
وعبرنه السابعه وجناحي ما درته
ولحد ثامن سمه وصلت الشهكه وياك
واسافر والتراب بجدمي ما دسته
ونكت ثيابي يمك جان بيهن غيم
من ثمن سمه للكاع وصلته