اجيتك من خلص دمعي

اجيتك من خلص دمعي
ونشف هرش الصبر بيه
اجيت اتوسل بروحي
ويكضني المستحه من جفوف رجليه
اجيت وجدمي مانكله يخط مزويت بدويه
وادري بشرك عشرتكم ثخين يمحن الحيه
العاف الزرع بالسنبل هم ترجه لكرابه يعود
خلص كلب النخل وي كلبي واصبح
عود يحضن عود
يكلي العايش اعله الطوش صار
يزامط الصاعود
مومثله صفت دنياك هسه
ايخرمش العنكود
ليمته بسجه الما توصل الديره
ليمته الروح يشربها القهر
وتزوعها الحيره
وليمته وعمري بس زنجيل ما شايف
ضوه الليره
وعشت عمري شمع للناس للظلمه
الترافجني
وعشت عمريسدر ما يمص خيس الكاع
والجلمه الشريفه اسلاح تاخذني
وعشت عمري ويرحاله تمدني
بساط وتلفني
ونظر روحي اعله مد الشوف
بيت توسط الفيضه
فسد حجي الشته وياه
يرد ويزامط بكيضه
لجن طبع الكشر مامون يدفن
خيسة البيضه
اظن غرك حجيها الناس تالي
السجج تتلاكه
وجذب هور الجبايش
يعرف الناكه
ولون روحي تطريك وتكول
اليوم مشتاكه
لكبصه بطرف هدمي واحطها
شبيح تفاكه

الشاعر عماد السلطاني