سلامتك هاتقولك علي أعراض إدمان السكر و بدايته و إزاي تتخلص منه.
معظمنا بتيجي عليه اللحظه اللي بيحس فيها إنه محتاج ياكل حاجه سكرها عالي مش عشان حاسس بهبوط لكن بسبب الحاجه المزاجية و طبعا مجرد ما أكلت قطعة الشيكولاتة او قطعة الحلويات بتحس بإحساس المكافئة (إحساس بالسعادة) و ده لإن المخ بيفرز مادة الدوبامين و المادة دي هي اللي بتخلي الإنسان يرجع تاني يستهلك السكر و مع الوقت كمية السكر بتزيد لإحتياج الجسم المتزايد للدوبامين.
طب إيه هي أعراض إدمان السكر؟
1- الرغبة الشديدة في تناول السكر.
2- صعوبة في التحكم في تناول الحلويات.
3- ظهور التوتر و القلق في حالة قلة الحلويات و تغير المزاج.
و إيه اللي ممكن يحصل لما إستهلاكي للسكر يزيد؟
أمراض كتير جدا بتحصل من زيادة إستهلاك السكر بتبدأ من مقاومة الانسولين لمرض السكري و كمان السكر من المتهمين المسببين للسرطانات زي سرطان القولون و المستقيم و سرطان الثدي لإنه بيزود السمنة و بيسبب إلتهابات في الجسم.
طب إزاي نبعد عن إدمان السكر؟
أول و أهم خطوه هي التغذية الصحية و التقليل من الاطعمة المصنعة، ممارسة الرياضة، تعلم أساليب الإسترخاء للتعامل مع التوتر.
عشان صحتك هدفنا.. سلامتك بتنصح بتحديد كمية السكر المستهلكة يومياَ لملعقتين فقط.
