قولونك مابيحبش الألبان
لو أنت من الناس اللي مبتتستحملش منتجات الألبان، سلامتك هتقولك علي بعض المعلومات عن الألبان اللي تخليك تاخد بالك ليه القولون أوقات كتير بيتعب وليه بيأثر علي حياتك الطبيعية.
من المكونات الاساسية في معظم منتجات الالبان هو اللاكتوز و هو نوع من انواع السكر اللي بيحتاج انزيم اسمه اللاكتاز عشان يتهضم، و الانزيم ده نسبته بتقل مع الوقت بعد سن الفطام لان أجسامنا بتتخلي عن احتياجها للالبان كغذاء اساسي.
مشكلة عدم تحمل اللاكتوز هي معاناة من صعوبة هضم اللاكتوز و المشكلة دي بتحصل لما بيكون عندنا نقص في إنزيم اللاكتاز، وهو الإنزيم المسؤول عن هضم اللاكتوز في الأمعاء الدقيقة.
و لما بناكل اللاكتوز دون وجود كمية كافية من انزيم اللاكتاز، ممكن يحصل تراكم لللاكتوز في الأمعاء الدقيقة و القولون، و ده ممكن يسبب ظهور أعراض عدم تحمل اللاكتوز و الاعراض هي:
• آلام في البطن.
• غازات و إنتفاخ في الأمعاء.
• إسهال.
• غثيان وقيء.
و لو بتعاني من مشكلة في تحمل اللاكتوز، تقدر تاخذ بعض الإجراءات للتعامل مع المشكلة، زي:
• تجنب تناول المنتجات اللي بتحتوي على اللاكتوز، زي الحليب والأجبان ومشتقات الألبان. و تقدر تبدلها بالبدايل الخالية من اللاكتوز زي الحليب النباتي (حليب الصويا أو حليب اللوز) أو المنتجات الخالية من اللاكتوز.
• استخدام مكملات اللاكتاز، وهي أقراص أو قطرات تحتوي على اللاكتاز، و بناخدها قبل اكل اللاكتوز عشان نقدر نهضمه.
• تجربة المنتجات المحتوية على كميات قليلة من اللاكتوز، لانه ممكن بعض الأشخاص تتحمل كميات صغيرة من اللاكتوز من غير اي مشاكل.
سلامتك بتنصح بزيارة طبيب جهاز هضمي لو عندك مشاكل في هضم اللاكتوز.
